huwag mo sanang ikagulat

kung wala akong maisulat

ni isang titik o pamagat

ni kapiraso o kalat-kalat

huwag mo sanang ikawindang

kung bakit salat at mistulang

walang mga letra o katagang

abot-kamay o palutang-lutang

huwag mo sanang itatanong

kung bakit walang mga pulutong

ng pangungusap o mga saknong

na namumutawi sa bugtong

huwag mo sanang ikagalit

kung hindi ko mapigil pilit

ang napipiping mga titik

nagtatampisaw sa pananahimik

huwag mo sanang ipagtaka

kung bakit 'di tulad ng tula

laman ka ng puso at diwa

kong nag-uumapaw sa ligaya.